對媒體公司嚟講，康城國際廣告節就梗係用嚟抓客啦，但係雅虎行政總裁邁耶上星期就錯失咗呢個良機，聽講係因為瞓到唔知醒喎。
上星期二晚，全球四大廣告商之一嘅Interpublic搞咗餐私人晚宴，諗住畀邁耶同美國零食生產商Mondelez、啤酒生產商MillerCoors同希臘乳酪製造商Chobani嘅總裁見吓面，順便畀班客戶喺邁耶身上，套吓雅虎有咩好橋，但估唔到邁耶就遲咗差唔多兩個鐘。
聽講Interpublic等幾間公司嘅行政總裁等都未等到邁耶嚟就走咗喇，邁耶之後解釋話係自己瞓到唔知醒。
其中一個參加晚宴嘅總裁就寸嘴咁話，如果呢個係投資者會議，董事會議或者傾一啲有潛力嘅收購，邁耶就算唔知醒，佢啲手下都會叫醒佢。有人仲話，邁耶根本唔明白客戶、廣告收入同廣告代理商嘅價值添。
之不過，絲絲以女性嘅角度嚟諗，其實邁耶之所以瞓過龍，係絕對有道理嘅。因為一向以靚女見稱嘅邁耶，要有充足睡眠先至可以Keep得住個靚樣嘛！唔通啲廣告大客會想見到一個未瞓醒、個樣唔多靚嘅雅虎CEO咩！
余絲韻