又到「米粉」撲機嘅時候，小米社區尋日喺微博公布，將喺七月一日中午十二點，透過官網發售首批小米平板，可惜今次只得16GB白色版，售價1,499元人民幣，對容量要求較高或鍾情黑色的「米粉」嚟講，可能會有啲失望，一直採取飢餓營銷策略嘅小米，首發平板一仗對創辦人雷軍係不容有失。
小米早前已經公布平板電腦外貌，當時有16GB、64GB同128GB版，加上六種顏色供選擇，結果首批平板無得點揀。
「米粉」要留意，官網今次除咗賣小米平板，仲有紅米手機1S、紅米Note、小米盒子同埋小米電視2，但每個用戶只限買每類產品各一部，記住要先預約。
雷軍講過，平板電腦嘅成本比手機高，但銷量唔及手機，小米都考慮過係咪要出平板。佢亦直指Android平板唔好用，iPad市佔率只得三成多，但使用率高過其他平板幾倍，小米平板未來都要解決呢個問題。
余絲韻