鴻海近排攞到蘋果iPhone 6張大單，豬籠入水不在話下，除咗傳出要喺大陸請多十萬個員工之餘，大老闆郭台銘日前仲預告會喺近日正式宣布一連串喺台灣擴大投資嘅計劃，之不過，郭總呻話，依家喺台灣人才難求，鴻海對班大學畢業生開出逾三萬元新台幣（約7,800港元）嘅「高薪」，都搵唔到人做。
台灣科技業揮別近三年嘅寒冬，今年景氣明顯回暖，除咗鴻海，台積電、日月光、聯發科等大公司一樣都求才若渴，據聞，台灣股王大立光最基層嘅工人起薪加獎金，月薪可以有五萬蚊（新台幣‧下同）以上，但係公司仍然面臨嚴重缺工嘅問題。
鴻海今年三月啟動喺台灣聘請萬五人嘅徵才計劃，郭總話，集團最低薪金已經調高到2.65萬，請大學生更加開到三萬幾，但係都仲係搵唔到人。
一向信奉關公出晒名嘅郭總，啱啱就親自捧咗一尊重47公斤嘅關公像番鴻海總部安放，佢就順帶叫班青年人「要有信心」，「要多學習關公忠義嘅精神」。唔通郭總真係諗住，呢班台灣嘅後生仔聽到佢呼籲後，會決心學關二哥咁挨義氣？絲絲真係要拭目以待囉！
余絲韻