Market Insight：手機股風險因素唔細

趁住呢輪新股熱，四月出動到史上最強，多達29間保薦行幫佢上市一樣撻Q收場的「豬肉股」萬洲國際，有消息話準備降價兩至兩成五要捲土重來。一句講晒，舊年71億美元鯨吞美國SmithField筆債始終要還，依家要睇萬洲為咗集資，到底可以去到幾盡！

昨日靜市中，酷派集團（02369）爆升13.3%收報2.04元，夠晒搶眼。事緣公司發盈喜，預告首五個月盈利大增。不過，事實愈近iPhone 6盛傳的九月推售日期，一些智能手機相關股份的吸金力相當強，富智康（02038）、瑞聲科技（02018）強勢畢呈，昨日比亞迪電子（00285）仲創埋四年新高。

古勝冇點你 2014/06/25

萬里長空

酷派靠推4G機突圍

酷派改名前叫中國無線，自從打正旗號以本身CoolPad品牌推智能手機後，一三年業績報表經已預告，趁內地三大電訊商去年十二月正式獲發4G牌，今年公司會把大部分資源投放在4G智能手機市場開發，早前有調查機構報告話，五月其4G手機內地市佔率已升至兩成三，躋身內地一哥之寶座。

去年底古勝曾經推介過佢，理由好簡單，係如果小米出貨量都不及佢，在私募基金都叫緊100億美元，即780億港元估值，對比之下，目前得87億元市值的酷派，若非被低估，就肯定係小米叫價過高。只係估唔到佢股價可以咁波動，二月見2.68元創三年新高，五月掉頭跌番四成八，去到1.41元，近期因為4G出機數字勁靚，又炒過。

如果對Android系統有認識，都知全部相關智能手機都預載Google開發的Android軟件，若非對牌子死忠，用三星、索尼、小米、聯想（00992）以至酷派，講真分別唔係咁大。唔信，可以睇睇蘋果公司硬件規格同級的Android手機，售價平一大截，撇除蘋果公司頂上光環享有暴利條件的可能性，合理推斷，如果軟件一樣，用家體驗分別唔大，Android用家對價格敏感度比較高，係可以預期。

競爭對手磨刀霍霍

去酷派個官網睇一睇，酷派手機賣緊599至1,888元人仔，性價比唔錯，但同小米一樣玩飢餓式行銷，定個低價，再要指定時間推售畀消費者上網搶購，想買部試下都唔得。

到底Android手機生產有幾好利錢？以一三年為例，酷派有196億元銷售額，賺3.48億元，純利率1.78%，低過出名利潤微薄的電視及白家電生產商，例如創維數碼（00751）一三年的4.2%，海爾電器（01169）的3.3%。

今年酷派狂谷4G手機，第一浸新產品，毛利及利潤率抽升是常識，不過，競爭對手聯想、小米、華為同中興通訊（00763）今年都訂出相當進取出機目標，之後會唔會又陷入泥漿摔角，是捧場客要緊貼市況，睇到實的最大風險因素。

眨眼又過咗半年，呢半年無論係金魚缸大鱷抑或虾毛，都係搵食艱難，對於追求絕對回報的一眾對沖基金經理而言，更加係度日如年，皆因大市冇方向兼冇波幅！有理由相信，大部分尚未絕望的市場參與者，都寄望下半年股市會有番啲起色，「滬港通」可以視為一個契機，第三季度港股可能變得風起雲湧！

物流股將虛實融合

要找尋下半年表現跑贏大市的板塊，古勝的看法是，要改變過去的思維，別以為估值低迷的傳統經濟板塊會最先反彈，例如現時國策重視節能環保，類似煤炭等高污染行業，難以期望會再有好突出的表現。至於新興產業股，八月份阿里巴巴在美國上市，會否是本輪板塊估值頂峰之時，在下冇水晶球，只有着大家注意風險，小心行事。

結合傳統及新興產業的股類，也許顯得實在一點。就如服務電子商貿行業發展的物流行業，未來數年的發展將會是翻天覆地的，物流股將展開中長期升浪，值得期待。

當中，阿里系可留意海爾電器，騰訊控股（00700）系可留意華南城（01668）。若想搵具國資背景及地方優勢的股份，深圳國際（00152）又是個不俗的選擇。

古勝