美聯物業（01200）近期頻頻畀APEX狙擊，仲講明今個禮拜四會去股東大會踩場，呼籲集團主席黃建業出席面對股東提問。黃建業就話唔會理人哋講乜，最緊要搞好間公司，佢仲大吐苦水，話自己一路以嚟做嘅嘢，都係為股東好。
黃建業就話，四月時佢向永明金融買咗近一成股份，係用溢價買番嚟，自己身體力行以3.3億元支持公司股票。
佢講明唔會玩財技，唔識上下其手，真金白銀買股票，股東員工都好有信心。就算賣晒啲美聯股份畀佢嘅永明，最近都買返五百萬股，證明鍾意間公司啦。
有人覺得佢成日同公司做關連交易，將自己啲物業租畀公司，黃建業就大呼冤枉，話租金純屬市價，全數只涉及十幾個舖位，佔公司舖位組合好細，佔總舖租支出約2%。佢話其實好多時係公司要求租佢啲舖，有時佢都唔想租，佢話以後都會少啲，因為租畀街外人，加幾多租都得。
美聯呢兩年真係多事之秋，黃建業講明公司係佢Baby，41年心血，點都會搞好佢，以前曾經有幾次放手畀其他人管，最後都搞到不愉快收場，趁住依家佢自己管番，可以大改革，清一清瘀血。
余絲韻