期指觀瀾：震倉過後候低做好
上周恒指高低波幅得218點，靜到離譜，唔計昨日，整個六月指數得447點上落，同一至五月港股每月1,128至1,789點波幅相比差一大截。昨日港股終打破悶局，藉滙豐中國六月製造業PMI理想，來一招先抽高後急跌，好淡友企錯邊隨時恨錯難返。
昨日恒指跌389點收報22,804點，早市高位23,393點，破唔到六月上旬高位23,397點之後，午市見愈跌愈多，有趣是，見唔到有合理收市解畫，點解要跌，一跌仲要跌咁多，睇番整體大市下跌股份更達過千隻。
以昨日跌幅，主板成交得580億元，比上周五多70億左右，沽壓同點數跌幅唔多匹配，再留意昨港匯變動唔大，仲係貼近強方兌換保證價，外圍也沒有特別壞消息，昨日跌市似衍生工具莊家臨近月底，即月波幅唔夠下的一次震倉。
經昨日一跌，恒指已失守21,680至23,397點升浪的0.236回吐22,992點，昨低位22,802點，差幾十點去埋0.382的22,741點，如果大市23,397點是六月高位所在，即月波幅暫時得595點，即使筆者不睇淡後市，由數據上，感覺周五期指結算前，即月指數波幅仲有擴大空間，但追沽興趣唔大，反而想等機會低位再買過。
John Mullen