Market Insight：陽房穩陣收息之選

昨日下晝四圍問知唔知發生乜事個市隊得咁急，最後竟然一個比較合理的推測都無。個市跌得好全面，藍籌一面倒，46跌4升。客觀睇，無邊類股票特別弱拉低個市，大市下跌股份多達1,008隻，足足比上升股份多2.7倍，也是超過一個月第一次咁側重的「全日空」。

睇番滬綜指微跌2點收報2,024點，雖然無理會滙豐編制的PMI，但總算變動唔大，人民幣亦然，執筆時港元仲企住7.7513，比上周四的7.7497輕微回吐，仲企住今年高位，唔見資金外流迹象，因乜事到底港股要跌1.68%，成為亞洲之最（弱）？

大市轉勢理據未足

昨日未大插前，恒指波幅指數跌到11.27，創咗一一年推出以來新低，同美國VIX恐慌指數一樣，指數愈低，有一個解讀方法，認為揭示投資者未將市場轉向風險放入眼內，簡單講，係唔信後市短期轉勢，常言道：股市是多數服從小數，當牛頭角順嫂都唔買餸走去買股票，往往就係大市見頂徵兆。

古勝冇點你2014/06/24

萬里長空

但古勝認識的賓架中，其實五月大市由低位在無特別利好消息支持下逐步收復失地，無太多個夠膽追住個升市入貨，反而等跌市買才是主流睇法。觀乎昨日跌市成交未算多，證明沽壓唔大，大市轉勢假設理據唔夠。

個市罕有悶局，恒指波幅指數低企，意味整體大市引伸波幅下滑，對衍生工具莊家及發行商最無好處，「窩」愈低派貨出街的值博率相對亦都會減低。昨日會唔會純粹係輪商及衍生工具莊家所為？睇落算係最有可能的推測，如果係咁，大家都係唔好太急於判後市死刑好啲。

昨日早段內險同內銀股都仲好哋哋，到下晝就兩個樣，好似隻中國人壽（02628），由全日高位21.45元回落至20.35元收市，跌幅3.1%，來回成蚊有多；中國銀行（03988）股價由高位3.51元回落至3.38元收市，下跌2.5%；平保（02318）亦由全日高位62.7元回落至60.2元收市，跌幅為2.1%。

重磅股短線趨波動

恒生中國H股金融行業指數收報14,165點，跌1.79%，較恒指跌幅1.6%為大。奇怪係A股表現冇異樣，拆息亦未有異動，到底今趟係港股行先A股，抑或係香港本身面對不明朗因素使然，屬重磅類別的中資金融股先要挨沽，就要做事後孔明！

不過，股民還是努力去尋找港股跌市原因，其中一個說法係話內地經濟數據好，經濟回穩，微刺激措施會暫告一段落，亦唔會再有降準甚而減息之舉云云。古勝覺得呢個解釋充滿矛盾，內地經濟數據勝預期，意味經濟回穩，下半年前景並不悲觀，這本應係利好而唔係利淡股市的消息。說成中央就冇藉口再出手救市，不利股市，實在有點牽強，會唔會係大家諗多咗。大市每月有一千幾百點上落波幅係正常，六月份波幅將集中在下旬出現，重磅股表現會較波動，故沾手相關衍生工具，亦宜注意風險。

恒地增持至係亮點

恒地（00012）宣布以19.6億元向陽光房地產（00435）注入太子道東物業，有關寫字樓項目樓高26層，估值20億元，位於九龍太子道東712號的友邦九龍金融中心，該物業目前出租率98.9%，每方呎平均月租13.24元，是否如交易中所述屬於「甲級寫字樓」，見仁見智。截至今年三月底止的一季物業收入淨額1,110萬元，賣方提供的收入淨額保證，交易至明年六月底是5,034萬元，一六至一八年六月底止年度則為7,350萬元，意味保證物業年度化後，及其後三年收益率都不會少於每年3.75厘。

截至去年底中期業績，陽房148.7億元物業組合的收入淨額為2.59億元，假設下半年相若，淨回報3.48厘，那收購項目吸引力應稍高於陽房現有物業組合。當然，達標要看是來自項目租金增長，抑或恒地補貼。從今年首季表現看，物業租金未來要有相當增幅先得。

恒地透過交易後錄得6.13億元帳面溢利，同時又以當中7.84億元，以高於市價每單位3.9元認購2.01億個陽房基金單位，反而是交易亮點，收息之徒，現水平可留意吓。

古勝