絲絲講場:小米唔搞房產 雷軍Say Sorry

小米手機喺內地同香港都賣到如火如荼,早前仲傳出小米老闆雷軍會做埋房地產嗰瓣添,但雷軍終於表態,似乎就唔多想喎。尋日下晝雷軍就喺微博公開咁同大家講小米唔會做房地產,並且希望「米粉」原諒,因為小米家陣要全心全意搞好智能手機、智能電視,實在再無餘力喎!

開發智能家居惹遐想

其實小米想做埋房地產呢個傳聞都未必係「空穴來風」嘅。今年小米開始同華潤置地(01109)合作開發智能家居,而喺近日佢哋聯手打造嘅「華潤‧萬橡府」智能家居平台,仲首次開放畀人參觀,令人好奇小米係咪同房地產發展愈行愈近。

小米仲即將喺明年完成第一個「小米地產」嘅首期項目。呢個項目其實係一個提供畀小米員工「先租後買」嘅住屋福利。呢個項目有晒成個珠海唐家灣嘅海景,但售價仲平到令人難以置信。

雖然雷軍就好明確咁同大家講話小米精力、能力有限,做唔到房地產。但今日唔知聽日事,邊個話得埋到底小米第時發展係點?

余絲韻