一年出咗825萬美元（約6,435萬港元）花紅，都要告公司？冇錯，一位高盛前交易員Deeb Amin Salem，認為高盛喺一○年畀佢嘅呢份花紅，較佢原先預期嘅金額少咗大拿拿500萬美元，所以就聘請律師將高盛告到紐約州最高法院，誓要索償1,650萬美元。
據報道，35歲嘅Salem係一位明星級抵押貸款交易員，聲稱幫過高盛賺超過70億美元，所以喺一○年，佢好有信心同佢阿媽講，佢份花紅會高達1,300萬美元。
確實，Salem喺○九年拎到1,500萬美元嘅花紅，仲超過高盛行政總裁布蘭克費恩，都咪話唔犀利，所以當一○年知道花紅大縮水之後，佢感到非常震驚。
當一一年佢嘅花紅跌到得番300萬美元，佢終於決定喺之後一年跳槽，過檔一間對沖基金公司擔任投資組合經理。
Salem話，自己嘅花紅被不公平扣減，相信同○七年做工作評估時收到書面警告有關。當時佢形容自己係專業熟練嘅交易員，並值得升職做董事總經理。而佢喺近期嘅聆訊中，都不時強調自己係抵押貸款行內最搶手嘅投資專家。
對於Salem嘅指控，高盛就認為咁係「完全荒謬」（utterly ridiculous）。唔知道Salem嘅媽媽又會唔會支持阿仔嘅「據理力爭」呢？
余絲韻