有「壞孩子」之稱嘅英國對沖基金TCI創辦人霍恩（Christopher Hohn），以前賺到錢，都會捐一大筆畀佢老婆打理嘅慈善基金，大家都以為佢哋好恩愛，點知都係離婚收場，為咗分身家，喺法庭拗餐飽，連累埋慈善基金都冇咗條水喉。
女方話霍恩一生都喺度賺錢，估計生意總值最多達8億美元，要求分佢一半；霍恩形容自己係一位專業運動員，成立咗一家公司，並請嚟教練、物理治療師同其他支援人員協助發挖佢嘅才能同天賦，故此，霍恩係無可取代，一旦佢離開，公司就會變得一文不值。霍恩又話佢得1億美元資產，女方只可取得當中四分之一。
最終法官未有接納女方嘅要求，呢單官司仲透露咗，原來TCI自一二年起已停止向女方嘅慈善基金捐款，咁耐以嚟TCI累積捐咗19億美元。
TCI喺香港都風光過，最聞名係投資咗新世界發展（00017）及領匯（00823）。喺○六年TCI成為領匯股東後，曾安排TCI Asia董事何志安進入領匯董事局，外間一直猜測TCI會將領匯拆骨出售，但跟住嗰年TCI「黯然而退」，大幅減持領匯至低於5%，市場估計，若以入股領匯的成本價每股11.78元計算，TCI僅獲利約15億元。
余絲韻