絲絲講場：廣汽新車拍住變形金剛
廣汽集團（02238）自主品牌「傳祺」即將蜚聲國際，方法好簡單，就係喺全球上映嘅荷里活巨片植入品牌汽車，出鏡率有幾高尋晚首映就揭曉咗。集團旗下廣汽乘用車總經理吳松就話，見到品牌汽車出現喺大銀幕上已經好激動，亦唔期望觀眾睇完戲馬上會去買車，覺得國際消費者畀「傳祺」體驗機會，就算成功。
佢又話，傳祺總共有三款車型喺《變形金剛4》出場，其中有款新能源概念車會載住片中嘅中方重要角色，其餘兩架分別以中國軍方車隊形象同埋中國明星李冰冰專屬座駕霸氣出現。
借宣傳走向國際
吳松仲好自豪咁講，喺新能源概念車亮相後，套戲嘅製片主動搵上門，導演仲去過廣州工廠，親自參觀傳祺生產線，呢套戲喺中國拍攝期間傳祺仲做埋劇組工作用車。
不過，廣汽傳祺嘅贊助費係幾多？吳松就以「沒聽過」回應，笑言雙方「有緣分，商業談不多」輕輕帶過，直指未來先係重點。咁又係，傳祺已經打算今年八月、十月同年底推三款新車型號，明顯食住荷里活大片個宣傳打造國際品牌形象，話到明出口主攻中等國家，中東、南美同中國周邊國家，隨時名利雙收。
余絲韻