絲絲講場：京東造勢 老闆送上門

之不過，今次由京東挑起嘅減價，火力明顯比唔上「雙十一」，有消費者喺網上勁彈，話京東自己叫減價叫得最大聲，其實係雷聲大雨點小，好多嘢賣得仲貴過蘇寧同國美。

內地消費者買嘢一向鍾意「貨比三家」，好快就有人發現，其實京東所謂嘅大減價唔係太信得過。

大減價被踩唔夠人平

內地格價網站嘅統計都顯示，「618促銷」當日，圖書類產品最平嘅其實係當當網；數碼類係亞馬遜；家電類係蘇寧易購，而講到總體，最實在嘅係國美在線，嗰日網站歷史最低價產品佔嘅比重有成四成二，高過京東六個百分點咁多。

咁就難怪就算有強哥親自送貨上門，今年個「618電商促銷」都風平浪靜。有好多網友話，對於劉強東變身速遞員嘅興趣不大，不過，如果送貨嗰個改成佢女朋友「奶茶妹妹」又唔同講法。

唔知劉強東又會唔會採納建議，喺出年嘅促銷活動請女朋友客串埋一份呢？又或者情侶檔送貨都唔拘呀！

余絲韻