卡尼薪酬近半係房津
其實卡尼掌舵英倫銀行八個月嘅底薪夾埋得32萬鎊，凸咗嗰26萬幾鎊係房屋津貼，事關倫敦嘅物價比起佢之前做加拿大央行行長期間所定居嘅渥太華，不知高幾多倍，卡尼臨過英國前幾個月，曾經形容倫敦係物價最貴嘅首都，英國財相歐思邦要撬人，點可以唔加多啲獎賞呀。
況且，卡尼26萬幾鎊嘅房屋津貼冇幾多落袋，因為三分之二拎咗去孝敬包租公，可見倫敦樓價有幾貴，難怪佢要爆響口想提早加息啦。
之但係更牽動英國納稅人情緒嘅，或者係英倫銀行公布，舊年佢哋資助咗卡尼一家六口10.28萬鎊搬去倫敦，其中包括機票、搬屋、臨時住宿、幫佢四位千金撲學校。
余絲韻