「我創業時就諗好50歲後要投入公益事業。」阿里巴巴嘅主席馬雲今年即將滿50歲，佢真係兌現承諾喇！喺前晚，佢就邀請咗比爾蓋茨同多位知名企業家喺北京撐枱腳，討論公益事務。
華遠地產CEO任志強都有出席呢個慈善晚宴，佢喺微博公開出席名單，當中包括銀泰嘅沈國軍、招商銀行前行長馬蔚華，佢仲透露係馬雲專登安排同蓋茨會面，交流喺公益方面嘅心得，希望可以推動中國公益事業。
其實馬雲曾經同公眾分享過人生計劃，佢打算50歲前先專注賺錢，50歲後就開始搞慈善。而即將滿50歲嘅佢完全記得當初嘅承諾，佢喺四月就同阿里嘅另一位創辦人蔡崇信，成立個人公益信託基金，從阿里嘅期權得到資金，規模仲佔即將上市嘅集團總股本2%。
馬雲仲公開會將基金投放喺內地矛盾同怨言最集中嘅地方，分別係環境、醫療、教育同文化四個範疇。
馬雲首個公益項目即時獲大量好評，就連蓋茨同股神巴菲特都表示讚揚。蓋茨曾經指出中國慈善行為冇系統，仲批評中國嘅有錢人雖然買好多高品味嘅產品，但就唔接受慈善事務。經過今次嘅慈善晚宴，蓋茨就將呢一次偉大嘅會面，圖文並茂放喺Twitter，相信佢一定對中國商人刮目相看。
余絲韻