期指觀瀾：窄幅上落只宜小注
在今日凌晨美國聯儲局公布議息結果前，即周三已有部分人平晒倉專心睇波，事關個市近期唔上唔落，成交日日得四字頭，真正悶死人。近期市場無主題，且資金流動性減慢已成常態，如果只係即市搵食，以近期每日波幅得百餘點計，實在無得玩。
講番市況，外圍股匯債市皆無異動，美國十年期國債孳息在2.5至2.6厘水平反覆，歐美股市在高位徘徊，外幣除英鎊較強外，其餘外幣以橫行整固為主，在此投資環境下，要港股獨領風騷確實有困難。
昨日恒指大部分時間於23,170至23,220點水平上落，僅在午後時間衝過一段，但只維持半小時即回至主要橫行區內窄幅波動，最終報23,181點，跌21點，主板成交463億元。即月期指同樣無方向，期指日市收23,173點，低水9點，成交張數3.69萬張，可幸未平倉合約有近11.29萬張，反映在市況淡靜下，部分以往炒即日鮮者亦無奈要持倉過夜。
由於未知聯儲局會唔會出意外，加上此前市況窄幅波動亦欠值博率，去賭吓波都無謂持貨過夜。反而今日會觀察昨晚美股及今日港股開市反應作兩手準備：若期指開23,300點水平會即市短沽；相反，若低開於22,800點水平則會短揸，賺130至150點就平倉甚至反手做，一於小注怡情。
John Mullen