華為創辦人任正非嘅接班安排，一直係業界關心問題，任正非嘅兒子任平，同埋跟隨母姓嘅女兒孟晚舟，都曾被認為會繼承華為嘅通訊王國。不過任正非近日接受內地媒體訪問嗰陣，就強調華為永遠唔會由家人接班，又暗示年逾七十嘅自己未有退休嘅打算。
華為近年大搞團隊領導，任正非就話，作為華為輪值CEO嘅徐直軍，早前已經講過華為嘅接班人係太多而唔係太少。而對任正非自己嚟講，有一點肯定嘅係，公司唔會由自己家人接班。
任正非話冇打算退休，仲引用埋幾位「老」友做例子，證明呢個做法好普遍。好似依家78歲嘅和黃（00013）前大班馬世民，仍然活躍於投資界；AIG前行總裁格林伯格喺88歲時仍未退休。又主動爆料，話華為同思科（Cisco）雖然係競爭對手，但自己同思科行政總裁錢伯斯亦係老友，對方甚至曾就思科接班安排，同佢交流意見添。
華為過往嘅低調，令外界覺得華為背景神秘，任正非就話華為過去其實唔係唔想宣傳，只係產品過往針對全球300多家通訊網絡企業為主，向客戶做實事作為定向宣傳明顯有效得多，好似利比亞內戰、日本3.11地震、福島核事故同智利九級地震等事故中，華為前線員工堅持對通訊設備修復，就係最佳廣告。
余絲韻