會計師成日對住啲數字，畀人性格古板、精打細算、日做夜做嘅感覺，絲絲尋日見識咗一班不一樣嘅會計師，專業得嚟好有生活情趣，鐵人、咖啡師、烹飪、拍戲、從佛學到慈善都有。
澳洲會計師公會大中華區分會二○一二年會長潘志威（Bernard）鋼條身形，一睇就知係運動家，原來佢已經玩咗廿幾年三項鐵人賽，又做會計師，又要操練，邊有咁多時間呀？佢話寧願休息少啲都唔會放棄練習嘅機會。
潘志威仲話知道好多後生仔都會怨因為工作而冇晒私人時間，佢就話「如果放棄個人興趣，人就同機器冇分別。」計絲絲話齋，「如果做人冇夢想，同鹹魚有乜分別嘅道理一樣」。
澳洲會計師公會企業事務委員會二○一四年聯席主席郭百祥（Patrick），就顛覆咗大家對會計師刻板嘅觀念，毅然離開會計行業，走去管理咖啡品牌形象，深愛咖啡嘅佢仲考埋個咖啡師牌照，無論工作幾忙，佢都會每日沖杯咖啡。
佢仲幽默咁話，都係因為會計工作，咖啡先會成為佢不可或缺嘅伴侶。
香港大學專業進修學院及澳洲會計師公會早前就出咗一本書，叫《會計•品味•人生》，邀請咗29位會計師分享佢哋工作以外嘅興趣，睇完之後，大家就會知道會計師嘅品味人生，可以去到幾盡。
余絲韻