期指觀瀾：悶局持續先行平倉
恐怕唔少市後評論，都會話港股今個星期初的悶局，緣於市場等待一連兩日美國聯儲局議息結果。但話說回頭，維持息率不變及每月再減百億美元買債規模，幾乎毫無懸念，說穿了，大家等運到至真。
華爾街三大指數近期都在高位牛皮，中國六月出口及第二季GDP未有耐曝光，市場欠缺了突破悶局的催化劑。
恒指昨日全日115點波幅，與周一比較，論到悶之程度，是五十步笑百步。恒指收跌97點報23,203點，主板成交491億元，期指日市收23,156點，國指跌55點收10,466點，國期收10,351點。
人人話「五窮六絕」，仲有九個交易日先至捱完六絕月，月初至今恒指得447點波幅困局，會唔會維持到月尾？好難講，經過昨日一跌，手上國期好倉帳面利潤跌番一半出街，得番53點，炒期指上落仲細過賭波，認真罕見。今日筆者決定平倉算數，專心睇波。
如果堅持唔炒過唔舒服，可以吼冷門，昨日恒指波幅指數跌至12.73，是一三年一月以來新低，昨收市攞一百點出嚟，已夠同時做23,600點認購及22,800點認沽長倉，小注試試，睇未來幾日個市會唔會有奇迹，變成價內機會有限，但博溢價一升食胡並無不可。
John Mullen