Market Insight：新世界炒資產折讓

然而，昨日英國公布五月通脹率，由四月1.8%跌到1.5%，創下○九年十月以來新低，另公布官方四月樓價升9.9%，是四年以來最大年度增幅。英倫銀行到底要避免通縮出現抑或壓抑樓市升勢為先，頓時受到考驗，姑勿論點，今浪英鎊要攻破1.70，似乎唔係想像中咁順利。

到底因為捱夜睇波，抑或畀個個市悶親，日上三竿仲係昏昏欲睡，已開始搞唔清楚，惟港股無方向是事實。昨日恒指全日115點波幅，收市跌97點報23,203點，主板成交唔多，得491億元。

古勝冇點你

萬里長空

反而有小小令人擔心的是，升跌股份比例繼續惡化，指數跌幅有限，可是上升及下跌股份有466隻及903隻，下跌股份幾乎是上升數目的一倍，指數破位唔多願郁，似乎一批缺乏耐性的投資者，忍唔住喺高位減磅。

隆成勝在茄薯充裕

上咗市十五年的嬰兒車生產商隆成集團（01225），向美國Dorel出售本業套現9.3億元，準備把當中2.27億元或者每股0.3元，以特別股息派番畀股東。昨日股價抽升15%至1.15元。派錢後，隆成手頭現金7.66億元，如果信管理層可以帶領公司成功轉型，發展醫療業務產品（去年仲蝕緊200萬元），估值唔貴，至少可視隆成為淨現金公司看待。

前日寫新世界發展（00017）私有化新世界中國（00917），過唔到後者的股東特別大會。當時通告未出，只知四百幾名股東投反對票，搞到單刁遭否決。昨日睇番通告，原來494名投反對票股東，揸得323萬股，佔投票股份僅僅0.16%，殺低咗揸20.49億股（投票股份99.84%），出席投票贊成的255個股東，真係股市的大衞戰勝哥利亞的又一翻版。

計落四百幾個人頭，平均每人持6,540股，以停牌前收市價6.38元計，是區區四萬一蚊貨仔，居然搞瓜咗成個私有化計劃，呢個集體嫌錢腥的攪局行動，成為昨日飯局老友熱烈討論話題。

昨日新中復牌，股價最低見4.99元，跌穿私有化消息前起步位5.14元，比預期跌得多，但以近一季內房股氣氛，唔算太離譜。最神奇仲係新世界亦跌住收市。古勝已經講過，供股買新中計劃泡湯，新世界等於無端端有股東出資減債，美銀美林計淨負債降至26%，仲未計賣掉CSL負債可進一步回落，資產負債表靚咗，斷估資產淨值折讓有條件收窄，低過9元入貨，在下認為中線輸面極之細。

證券行博收購難估

上周內地券商西南証券收購敦沛金融（00812），唔使等十月滬港通開通，內地券商看來急不及待嚟香港爭定櫈仔，等滬港通開波提供機遇。可惜今次同內地銀行嚟香港掃銀行牌唔同，本地證券行多，上市選擇都唔少，要一注押中獨贏難度極大。

近幾日古勝左度右度，行內名聲好、晒士唔細，好似新鴻基公司（00086）未必係收購者杯茶，至於市值比較細的，唔係業績麻麻就係成交極奀，似乎只適合大大聲細細注，亂石投林打打水片，想搵真銀唔容易已。

揀股必須與時並進

足球係大眾運動，發展至今時今日，亦涉及唔少外圍波纜，且彩池唔細。為興趣、為金錢，都成功吸引全球目光。過去類似的盛事，電視機、啤酒等股份都唔難有短暫的炒作，但眼前連短暫炒作都冇，皆因身處互聯網時代，除電視機，電腦同手機都睇到直播賽事。

至於啤酒股，現成可供選擇的實在不多，龍頭股經已長期坐享高估值，如今面對呢類「盛事」股價亦唔多有反應。所以話，炒股都要與時並進，冇一本通書可以睇到老。

二千年科網股計「EBITDA」同「Click rate」，瘋狂炒作過後爆煲，那會想到十多年後，電子商貿真係成規模，真係賺到錢，更獲國策支持，科網股又成股民追捧對象。現時新能源汽車、再生能源概念時有炒作，但估值有數得計，相信在各國努力推動節能環保及應用再生能源政策之下，未來可成長青板塊，股友可順住大勢揀選優質的股份作中長線持有。

古勝