好運緊要過好波，瑞士完場前一刻殺低厄瓜多爾，當然感覺良好，但過程的確說服力不足，行軍節奏太慢，難怪馬會立刻調高下仗瑞士勝出賠率，睇高法國一線。
對於瑞士，自己當然有所謂稟賦效應（endowment effect）的心理偏頗。如果要落注單場，一定繼續賭瑞士會擊敗法國。年青球隊是應該逐漸進步，愈打愈好，而戲劇化勝出之後，士氣可望大振。
至於今仗節奏慢，一來驚輸，二來厄瓜多爾太保守，瑞士本身則不夠創造力殺入去，但面對法國的話，則應該可以盡情發揮打反擊的威力，何況法國只是贏十人應戰的洪都拉斯，不必太過雀躍，牌面是法國稍高，可是種種條件可以調節，加上賠率傾斜，便值得扒冷。
從以上論據可見，投資分析根本從來不會客觀，必然會被自己的既定立場所左右，畀藉口自己，而挑剔別人。明白這一點其實是十分重要，瑞士是冷門，就算更主觀，死牛一面頸，心中總會有顧忌，但假如將以上的偏頗應用在熱門球隊，例如巴西阿根廷之類，由於賠率低，兼且自以為做足功課，隨時大大注瞓身買，萬一一個唔好彩是可以輸死。
要解除魔咒，變得客觀，基本上無可能。所以從來風險管理的最重要法則，一定是單一項目注碼要設限，以免一鋪清袋。另外，最好溝上唔溝落，以為眾人皆醉，賠率變冷價位愈低而愈買愈多的話，是經常可見的出事理由。千祈不要以為自己會清醒客觀，未落注的時候或者尚且可以，一開始有盤，就一定有立場。
不要誤會，有立場不是壞事，要有立場才可當機立斷，只不過有立場同樣代表風險會增加而已。
豐盛金融資產管理董事 黃國英（作者為註冊持牌人士）