絲絲講場：恒參楊永仁父女兵上陣
挾「洋參大王」楊永仁之名登場嘅恒發洋參（00911），尋日舉行投資者推介會，絲絲見楊永仁隔籬有位年輕女士，望落又有啲似楊永仁，原來係佢大千金。
年近半百嘅楊生出名皮光肉滑，尋日仲叫現場記者摸吓係咪真係咁滑溜，絲絲睇到都相當讚嘆，但更吸引嘅係同楊生成個餅印咁嘅位千金Karen。佢仲好撐老竇場，推介會同記者會都有去，不過就比較怕醜喇。
長女Karen拓燕窩市場
Karen係楊生個大女，仲有細佬細妹喺外國讀緊書，聽講Karen依家喺楊生私人持有嘅另一間公司做，專做燕窩，咁又係，話晒燕窩養顏，係女仔都鍾意啦。咁唔通留番畀細佬妹接手阿爸盤洋參生意？
講返恒發洋參，絲絲除咗歎過杯參茶，現場仲見到有月餅同麵，當然係有花旗參成分啦，聽講月餅今年中秋節就會登場，話同恒香合製，但會印番「恒發洋參」個嘜頭。仲有三個月就中秋，大家對花旗參月餅又有無興趣呢？
余絲韻