絲絲講場：證監睇市轉眼25年

25年前，即係一九八九年，港股市值得六千億元，吓！依家一間上市公司市值都唔止六千億元啦！但事實的確如此，港股市值依家已有23萬億元，增長成37倍有多。

上市公司290變1400

至於上市公司數目，由八九年約290間，增至1,400多間，增長3.8倍。至於證監會持牌人數數目，增長都好犀利，由當年嘅1,900人增至39,000人，勁升19倍。

有股壇前輩就話，八九年時剛經歷股災無幾耐，股票市場元氣大傷，當時市值真係得幾千億元。「依家睇番金額就好似好少，但當時六千億元係好大數目！」不過，佢反而話，近年多咗咁多上市公司喺香港上市，但成交額近年冇乜進帳，港股市值23萬億元都維持咗好耐，升極都升唔到上去，只能怪個股市唔生性，指數彈唔起！

銀禧特輯溫故知新

佢仲話，如果恒指升上3萬點，港股市值可能會有30萬億元，到時港交所（00388）可能就要開香檳喇！話時話，港交所都好耐冇開香檳，唔知「滬港通」十月開波時係咪應該諗諗佢！

講番證監會，25年嘅確係一個重要里程碑，證監會就快出年報，據聞年報中有個25年特輯，會搵番啲昔日領導同員工，講吓舊事，又展望吓將來！

余絲韻