Market Insight：中海發展小注無妨

客觀條件，美股開始出現高位拉鋸居面，而近月中國PMI及出口數據好轉，定向降準等微刺激經濟政策，吸引到基金經理對中港股市睇番好些少。主觀意願，未來一星期有近10隻新股招股排住隊招股，合共吸資120億元樓上，資金泊入港元區相信多少與此有關，也令到大市在高位升得慢，又唔願跌的牛皮悶局。

畀古勝批中，新世界發展（00017）供股私有化新世界中國（00917）的計劃，埋門一腳撻Q收場。成件事最意想不到係私有化計劃上，唔係有買貴貨之嫌的新世界小股東舉腳反對推倒交易，反而係被收購的新中股東大會中否決。

姑勿論點，新世界股已供、錢已袋，亦唔使回水，負債比率將會大降，個人認為私有化不成一啲都無蝕；反而最不利係一直想博到最後，等每股6.8元投降的新世界中國小股東。

古勝冇點你

萬里長空

大孖沙早作部署

睇番新中股價，消息前由5.14元炒上嚟停牌前6.38元，儘管近排內房股無五月氣氛咁差，大都收復唔少失地，但新中復牌後跌番期間七成升幅唔奇，計落可以去到5.5元左右。成單刁最吊詭之處，是新中消息曝光後首日掂過6.8元投降價之外，大部分時間維持大約4毫子的套息水位。當然，同新世界方面多次揚言唔會加價都有關係。

期間沽空比例長期高企，單是五月至今，股數沽空比例出現單位數字只有三日，近投票日的個多星期持續三、四成的沽空，可見睇佢私有化計劃瓜柴，賭佢今日裂口開低搵銀的大孖沙唔係小眾。

滬港通最快三個半月後開車，個市炒無可炒，繼續玩AH股價折讓，幾隻折讓較大股份，洛陽玻璃（01108）、山東墨龍（00568）及東北電氣（00042），升幅介乎13至28%。

但老實講，睇番呢批大折讓股份，營運質素之差，買佢不如去賭波膽好過。另外，航運股都算滄海遺珠，自五月中國出口數據回升，兼好過大行估計之後，航運股都見唔少貪平的捧場客落疊，走勢較佳的兩隻算係中海發展（01138）及中外運航運（00368），分別有2.4%及1.3%進帳。

估值已甚為低殘

反映乾散貨運費的波羅的海乾散貨指數，上星期五跌到落906點今年新低，未夠○八年高位9,589點十分一，同年初大約2,200點比較，都跌咗超過一半。環球航運業會唔會因為中國一兩個月的出口表現回穩復甦？睇嚟衝入去都必須心口有個勇字。

不過，股票唔會一條直線向下，總會偶然會藉消息反彈。事實上，以中海發展為例，一四年預期市帳率只係0.63倍，同五年平均0.91倍有段距離，亦都仲低過○八年海嘯低位約0.7倍。

毫無疑問，要等盈利能力回升至一一年的10億元人仔樓上（當年純利比一○年大跌36%），樂觀睇至少等到一五年，較合理是一六年，賣點係夠平，小注無妨，睇今轉企穩5元，可唔可以見5.5至6元。

在去年十二月才掛牌的環亞智富（01390）發盈警，公司預計截至六月底止之年度收益將低於用作招股章程所披露的溢利預測計算基準之預測收益。上市距今相隔僅幾個月，業績就經已唔達標，雖然公司羅列出大條道理作解說，但講到底，都係令小股東失望。

環亞智富未跌定

今年首季，支付股曾是股民熱炒的板塊，但隨着騰訊（00700）股價見頂回落，阿里巴巴轉赴美國上市，科網（包括支付概念）股炒風已大為收斂。

環亞智富去年底上市，招股價3.59元，一月中旬見高位9.23元後，股價反覆回落，更失守招股價，上月初見上市以來低位2.38元後始回穩，惟反彈至4元水平現阻力，昨日盈警引發股價急跌，收跌20%報3.01元，大陰燭兼大成交，料後市頗大機會再試上月低位支持，不宜博反彈。

古勝