正當蘋果公司同三星電子互轟對方侵犯專利、對簿公堂之際，美國電動車生產商特斯拉（Tesla）舵手馬斯克卻反其道而行，竟然將手上嘅電動車同電池專利技術開放畀競爭對手，一時間令外界唔知佢葫蘆賣乜藥，為乜咁慷慨！
再一次企圖顛覆汽車行業嘅馬斯克表示，開放專利係希望低排放汽車更加普及，做大市場個餅，Tesla係唔會蝕底嘅。不過，對於呢個咁大賭博，唔知Tesla班小股東點樣諗。
講真Tesla依家熱賣嘅Model S，上年出貨量只有二萬部左右，好多專家都話電動車能否成功，取決於將成本降低，成為普羅大眾負擔得起嘅汽車，而唔係小眾玩意。對馬斯克嚟講，電動車能夠普及，重要過Tesla究竟有幾成功。
除咗Tesla之外，歐洲喺電動超級跑車都做出成績，被譽為舊年全球加速最快嘅電動超級跑車Rimac Concept One，係克羅地亞車商Rimac嘅產品，嚟咗香港展出。講起呢架車都幾巴閉o架，由靜止加速到時速97公里，只要2.8秒，暫時淨係限量8部，要買嘅話就起碼要100萬美元！Rimac嘅創辦人Mate Rimac講，考慮喺香港賣兩部，依家傾緊買家。
問佢同邊位億萬富豪傾緊先？佢笑笑口話都唔知人哋係咪億萬富豪，但總之身份就保持秘密啦！
余絲韻