港交所（00388）今年嘅重頭戲「滬港通」，仲有四個月左右就開波，港交所不惜工本，落力催谷。絲絲聽聞，港交所將破天荒製作動畫，介紹「滬港通」，放上網畀人睇，等散戶容易啲入腦。依家潮流乜嘢都興睇片睇圖，估唔到港交所都幾追得上潮流喎！
港交所今次搞「滬港通」動畫，初期針對「北向交易」投資者，即係港人買A股。港交所將會製作六條短片，每條兩分鐘左右，介紹「滬港通」各個重要環節，好似投資額度、投資者資格、可投資股票範圍等等，港交所瞄準港人「乜都要快」嘅心態，務求用最快速、最簡單方法，將「滬港通」重點，深入淺出講出來。
咁又係，港人買A股，真係冇乜經驗同認識，某啲股票真係連名都未講得出，猶如隔山買牛，投資者教育真係好重要！
除咗動畫外，其實港交所早前已印咗大量「滬港通」小冊子同海報，放喺經紀行，派畀散戶。又同經紀行開咗N次簡介會。聽聞，港交所行政總裁李小加短期內仲會飛去北美，向當地大型基金經理推介「滬港通」。總之，港交所上下瞓身為「滬港通」，直情「只許成功，不許失敗」！
余絲韻