絲絲講場:花旗卓曦文慈善集資王

世界盃仲有兩日就開波,身為英國人嘅花旗集團亞太區CEO卓曦文(Stephen Bird),梗係支持祖國英格蘭,不過佢話巴西有主場之利,肯定會有一場惡鬥。

雖然佢今年無緣去當地觀賽,但上星期六都率先睇咗場好波,就係「花旗慈善盃」。

今年個盃賽有8隊來自花旗同其他工商機構代表隊參加,唔好諗到大家會喺球場廝殺,其實大家都只係為慈善,總共籌咗17萬蚊,全數捐去慈善機構「寰宇希望」幫香港嘅基層兒童,Stephen個人籌咗超過4.7萬蚊,全場最高。Stephen話,慈善盃嗰日天氣好好,非常適合踢波。

佢自己本身係超級球迷,成日都同啲同事、客戶踢波,世界盃期間喺屋企就望實部電視,同囝囝一齊緊貼球賽。

盧偉明老人中心獻唱

咁啱得咁蹺,另一個Steven,即係花旗集團私人銀行香港市場總經理盧偉明,佢喺花旗「全球義工日」期間去咗老人中心唱歌,同院友打晒拍子唱《問我》,咁有愛心,真係冧死絲絲。

余絲韻