早前網上流傳一段地產代理高層爆粗訓示下屬片段，當事人原來係美聯物業港島區營業董事吳家棟，佢尋日喺住宅部行政總裁布少明陪同下，親自出嚟解畫，坦承「3年前，我做錯了一件事」。
佢話當時前線瀰漫高壓式管治文化，加上生意壓力大，一時失言責罵同事，布少明話已經向吳家棟發出警告信及嚴正告誡，仲明確話經過大規模「美勵變革」後，「瘀血」已除，不合時宜嘅高壓式管治文化已被淘汰。
講真呢個件事對地產代理嘅形象影響好大，所以佢哋都要正視問題。吳家棟自爆，自從段片曝光後，收到唔少電話騷擾，當中涉及粗言穢語，自言精神受到壓力，又話自己接受呢啲懲罰，希望大家畀個機會佢繼續努力工作。依家正學習排解壓力，努力改善個人質素及管理技巧。
布少明就話，3年前自己未上場，唔知道吳家棟係咪受到當時上司同樣嘅對待，而以此方式對待下屬。只可惜尋日解畫記者會得十分鐘，交代完件事就算數。
余絲韻