期指觀瀾：國期好倉相對穩陣
世界盃揭幕戰仲有幾日開打，個市已經靜到烏蠅飛過都聽得到，昨日恒指全日波幅得106點，即月期指好少少，上晝完成全日134點波幅。國期午市35點上落，口痕友話不如提早收市happy hour好過。
多得上周美股兩大指數創新高，以及中國五月出口數據反彈，港股昨開高135點，之後全日窄幅上落，收市升166點報23,117點，處十六個月低位的恒指波幅指數，再跌0.16收報13.57，即月期指日市收23,008點，較合理值高45點。
至於吸引到筆者留意的是昨沽空比率，七個交易日以來首次回到單位數，是否意味更多大戶投身唱好陣營？值得深究。近期指數貼住高位發展，可是支撐大市升勢的都係落後的舊經濟股，如內銀、石油及保險股，標誌新經濟的濠賭股則一仆一碌，保守的入市取向，話基金經理睇好後市所以頂住指數作勢挑戰23,224點上次得而復失的阻力，筆者睇落唔似。
如果無睇法，執平貨繼續是短期大勢，筆者情願試買國期好倉，可以更集中押注內銀內險，又唔使兼顧埋濠賭及騰訊（00700）等高beta股的波幅。事實上，五月中開始國指沿着10日線向上，升得慢，但主觀感覺升得相對穩定。
John Mullen