期指觀瀾：買賣兩閒再睇定啲

昨日六月期指開市早段見23,128點高位，之後全日主旋律仲係搵即市支持，周二早段22,975點，算係好友力守據點，昨日午後期指三次去到22,967、22,972及22,969點回頭，儘管沽壓唔算大，好友也缺乏反攻的意志，反彈去到23,015點已經行人止步。

午後期指得48點波幅，恐怕唔少即市炒家同筆者一樣，畀個市折磨到直頭想寫信叫港交所（00388）縮短番交易時段。「定向降準」的消息令港股升得一日，內地投資者更加唔buy，滬綜指連跌兩日，昨日再跌13點收2,024點，2,050點阻力始終無法突破，昨日輸百多點，仍先將周二的三分一注好倉止蝕。

破位唔行，反映個市仲未脫離上落市格局，踏入六月，世界盃開波只怕到時港股更加靜局，諗過再沽六月馬鞍式恒指認購認沽博賺期權金，但睇見恒指波幅指數低企，期權「縮窩」情況都幾嚴重，23,200點套裝價只係得640點，賭到月尾似乎唔算值博，決定一動不如一靜，睇多兩日至算。

John Mullen