絲絲講場：萬科員工健康有價
好多企業都將「員工係最大嘅財產」掛喺嘴邊，但唔係個個有實質行動，萬科就講得出，做得到，仲定咗啲好特別嘅規矩。如果員工比之前一年健康咗，可以拎到多啲獎金；差咗呢，就要罰，唔係罰員工，係罰上司，減佢哋1%獎金。
萬科總裁郁亮不嬲好着緊員工健康，佢話，員工嘅健康係公司嘅責任，與其搞醫療福利，不如花多啲資源令到員工健康啲，唔使病。
郁亮：未達標罰上司
點為之健康好咗呢？郁總話，會睇員工嘅多項健康指標，如果指標可以比一年前好，就會有獎，如果差過上年嘅話，就罰上司。唔知係唔係怕上司被罰，員工好努力保持身體健康，過去三年都未有試過有人被扣獎金。
郁亮都做好多運動，絲絲睇住佢由有肉地變到依家鋼條般嘅身形，舊年先登上珠峰，佢話，呢四年間佢一共瘦咗25斤，而嚟緊佢要練出六舊腹肌，目標要喺明年底做到。
早前融創（01918）同綠城（03900）合作，咁岩兩間公司都有講過要超越萬科，郁亮話，做老大並唔容易，「行業受到抨擊時，我們就站在被告席位置」，相當樂意有人願意分擔呢個角色。
余絲韻