孖妹S檔案：湊仔「期」俠策略講穩陣

彩兒：聽聞你○五年嗰陣辭咗金融界份工，之後全職專炒期指期權，兼湊兩個寶貝仔喎。但坊間話養大一個小朋友要四百萬喎！咁你點靠期指期權賺八百萬先？

岑：係啊！近年做咗全職散戶，專心炒之餘又專心昅實兩個皇上皇！不過近年恒指唔願郁，想喺標準結算時段（T時段）靠波幅賺錢愈嚟愈難，投資夜期仲係另一套玩法添！因為我兩個囝已經分別三歲同四歲，所以我個人風險胃納屬低水平，依家已經盡量採取較低風險嘅策略，會以短倉（Short）為主。我比較多用「寶珠倉」，即係沽「勒束式」（Strangles）期權，同埋「馬鞍式」（Straddles）嘅策略。目前本金有20萬蚊，每月回報約5至7%。

Kitty：你夜嘛嘛都炒埋期指，咁夜點落盤啊？

岑：依家夜期散戶除咗透過券商電話落盤服務落盤之外，仲可以自己喺網上運用SP Trader交易軟件，甚至手機應用程式落盤，大期來回只需60至70元咋！

彩兒：散戶要學人夜晚落盤，係咪可以有路捉？

岑：夜期開市初段走勢會跟隨歐洲開市初段，之後就會跟隨美國道指及標指開市初段走勢，再之後就會逐漸跟隨道指及標指細期（小型期貨）嘅走勢。不過，因為恒指成分股當中逾半中資股無喺美國上市，粗略估計夜期同美市嘅相關系數只有0.3至0.4。

預估方向 夜期食胡

彩兒：夜期成交疏落，究竟係咪較難賺錢？你有乜絕技呀？

岑：我每個月都會參加兩次投資講座，審視同調整番個人投資策略及部署。夜期成交疏落，市場數據太少，我哋好難完全用圖表做分析，主要係賭方向。我主要當夜期做食胡途徑，如果我預期第二朝係升市，為免夜長夢多，就會喺夜期平倉。當然要炒得好，最緊要是水頭充足，自可帶挈EQ提升，喺期指世界入面可以話係愈驚愈死。

Kitty：Matthew依家喺內地有3個寫字樓單位印印腳等收租，難怪炒得輕鬆啦！佢依家月月賺5至7%，咁落去，可能好快又買多個寫字樓啦！等我都要趁快學埋炒夜期。

彩兒、Kitty

若有料報畀彩兒同Kitty或有嘢問，可電郵money.biz@on.cc