孖妹S檔案：夜期補習班 練炒功迎加時
孖妹一直深信女生要夜晚十一點前瞓覺，咁啲肌膚先會保持白滑，但最近縱橫股場多年嘅姊妹告知，期指即將可以炒到近凌晨，唔通我哋要一路敷Mask一路炒？原來舊年被市場鬧爆嘅期指夜市（亦稱夜期，T+1時段），傳今年第四季交易時間會加時45分鐘，即係同美股開市重疊時間又會加長一截，不過好多股友好似仲對夜期唔算太熟，不如就搵期指專家同埋散戶「期王」同大家溫一溫啲玩法啦！
梁：浩邦金融董事梁彥穎
Kitty：我入股壇時間仍短，日頭炒股贏錢都唔易啦，更何況夜嘛嘛要捉路炒期指！可唔可以講解啲夜期細節畀我知啊？
梁：夜期即係期指市場日間標準結算時段（T時段）之後，下晝五點至晚上十一點進行嘅期指交易。投資者可以買賣恒指期貨、小型恒指期貨、國指期貨、小型國指期貨，同埋人民幣期貨，依家交投最活躍嘅就係恒指期貨。
尾市15分鐘最關鍵
彩兒：我哋收到風，話港交所（00388）有機會於今年十一月，即係美股踏入冬令時間嗰陣，延長夜期交易時間至晚上十一點四十五分，依家好似只差證監會批准咋！
梁：其實我一向都有炒期指，如果係真嘅，對我嚟講一定係好事！期指最重要嘅交易時間係臨收市前15分鐘，如果十一點四十五分先收市，咁即係就算同人食飯食晏咗，都趕得切最後衝刺啦！
Kitty：吖！我記得夜期交易制度同股票買賣唔同，佢係用T+1交易制度，即係今日做買賣，下一個工作天先結算。
梁：全對！如果夜期交易喺下一個T時段結束前平倉，單交易就唔會被視作過夜平倉。另外，夜期交易設有上下5%限價機制，咁就可以減低指數價格過分波動。
彩兒：不過，夜期成交一向疏落，又無期權同即市現貨，搞到夜期好難睇圖食飯，莊家數目又少過T時段咁多，令擘價情況好嚴重，好似恒指期貨（大期）咁，T時段擘價只有1點，夜期就可以高達3至5點，究竟初學炒夜期嘅散戶可以點入門？
梁：睇好大市走勢向上時，買方會喺現價買入恒指期貨，即持長倉；而賣方就即係睇淡大市，會喺現價沽出恒指期貨，即持短倉。睇啱走勢嘅一方會賺錢，另一方就會蝕，實際係零和遊戲。依家恒指同埋國指期貨每點價格係50元，而小型期貨係每點10元。
遇突發事件入市對沖
Kitty：有咩方法可以估夜期走勢？等我臨瞓前賺番筆發個甜夢！
梁：如果要簡單啲，大可以用保力加通道分析後市走勢。如果夜晚出現有力震盪股市嘅國際性大事件，投資者就可以即時喺夜期做相關部署或對沖，唔使乾等下個交易日。仲有，夜期開市時間係晏晝五點，同歐洲開市初段重疊，令夜期走勢傾向跟隨歐股市況，喺美股開市後，夜期就主要受美股影響，主因恒指成分股入面部分係美國預托證券（ADR），咁相關性自然高過歐股。
彩兒：夜期涉及槓桿，點先可以降低風險？
梁：如果希望買夜期，可考慮先喺T時段買定賣方期權（Put Option）；如果係沽恒指期貨，則可配合投資買方期權（Call Option），去鎖定虧損風險，即使睇錯期指方向，亦可賺到期權金。
彩兒、Kitty
若有料報畀彩兒同Kitty或有嘢問，可電郵money.biz@on.cc