絲絲講場：王日明湊大利邦功成身退
利豐集團改名馮氏集團、利豐（00494）新一代話事人接棒入董事局、分拆利標品牌獨立上市等，已明顯見到新人事新作風嘅幹勁。利邦（00891）董事總經理王日明，亦隨着連串變動，回歸馮氏集團，正式告別利邦。
王日明尋日last day，但佢都好盡責咁參與利邦整個股東會議，仲一貫紳士嘅作風咁話離別在即，亦無不捨之情。
助新CEO接棒
今年係佢加入利邦第九個年頭，睇住利邦嘅中國網絡規模逐一建立、由工廠變為零售商、由香港公司至今收購三個國際品牌，發展成為國際品牌嘅第一階段都算完成。為公司好，佢舊年更主動提出搵新CEO，主要為配合公司長遠發展，包括提升品牌國際知名度等。
前晚集團高層已為佢搞咗歡送晚宴，雖然佢無透露老闆有無特別贈言，但就多次表示，自己會繼續在馮氏集團旗下零售業務內辦事，只係轉咗地方。
不過，今個夏天未能真正調職，因利邦新CEO Richard Samuel Cohen雖熟悉國際歐美及高檔男裝市場營運情況，但對中國市場認識不夠，王日明話會協助新CEO了解公司及內地市場情況，希望交接順利啲。
余絲韻