內地打的軟件結束「燒錢戰」，無咗現兜兜嘅現金補貼，班乘客即時以行動表現不滿。騰訊（臨時編號02988）（00700）投資嘅北京小桔科技話，喺停咗補貼之後，公司旗下打的軟件「滴滴打車」嘅訂單量已經由以前高峰期嘅日均530萬單，跌咗去300萬單左右，跌幅成四成三咁多，相當之驚人。
「滴滴打車」？乜唔係叫「嘀嘀打車」咩？大家唔好以為絲絲寫錯字呀，原來係「嘀嘀打車」改咗名。
事源杭州有間叫妙影電子軟件公司，近排向法院起訴「嘀嘀」打車商標侵權，話「嘀嘀」個商標佢哋一早已經註冊咗喎。單案件已經被杭州市中級法院正式受理，小桔科技如果輸咗官司分分鐘要賠成八千萬人仔，公司為免麻煩，一於改名為「滴滴打車」。其實，「嘀嘀」同「滴滴」嘅普通話讀音完全冇分別，相信新名對班乘客來講一樣咁親切。
至於阿里巴巴集團有份投資嘅「快的打車」就話，因為時間太短，未計到結束補貼嘅影響。不過「快的打車」會同小米合作，以後用戶只需利用小米旗下智能按鍵「米鍵」，就可以使用「快的打車」。
其實，小米董事長雷軍一向好敬佩馬雲，佢前兩日喺內地講起創業史時，仲話創辦小米前，研究過馬化騰、李彥宏等大佬們嘅創業史，當中影響最大嘅就係馬雲。今次同小米再度合作，真係一啲都唔出奇。
余絲韻