絲絲講場：美銀美林「牛熊同體」
對於中國經濟嚟講，住宅市場係咪一個大問題呢？尋日美銀美林就喺同一個下晝內前後發表不同報告，先講「係」一個大問題，之後又話「唔係」，搞到市場人士睇到一頭霧水。
話說美銀美林昨日下午2點38分發表嘅《中國經濟觀察》報告話：「外界普遍認為城市住房供應過剩，而我們卻認為沒有大的投資問題。我們認為不會出現大崩潰。我們預計不會出現金融海嘯，國內生產總值增長不會出現硬着陸。」聽起嚟，美銀美林對中國經濟好似幾樂觀咁。
評中國經濟前後矛盾
但美銀美林其後再於下午5點08分再發布咗一份題為《中國，一個股市策略師的日記》嘅報告，觀點同之前嗰份報告竟然啱啱相反。呢份報告話：「中國好可能存在建設嚴重過度的問題，人均居住面積已經處於全球最高之列。」報告仲話：「能夠讓我們改變負面觀點的條件是：政府大刀闊斧地沖銷債務，改革金融體系，下調利率（可能導致人民幣貶值），關停過剩產能，推動企業利潤增長、讓企業恢復元氣。」
對於上述兩份報告觀點不一，美國銀行發言人就即時補鑊咁話：「唔使擔心」嘅觀點係嚟自其宏觀經濟團隊，而另一邊「需要擔心」嘅觀點就來自其戰略團隊。發言人仲話，眾所周知，呢兩個部門一向持不同睇法，而且仲一直都努力緊畀大家360度嘅全面分析喎。
余絲韻