Market Insight：內銀股前景有隱憂

可以想像，昨日有彈藥在舊「窗口」按每手500股（將降至100股）入貨散戶，唔係貪較低的入場費（收市價每手5.44萬元）。昨日騰訊製造出賓墟場面，一隻股票成交已經佔大市一成，去到56億元，多過排第二至六，中移（00941）、建行（00939）、滙控（00005）、工行（01398）及金山軟件（03888）加埋的總和，個市有幾側埋一邊，可見一二。

金軟能夠以非藍籌身份入到成交榜，一來被MSCI揀中，其次係姊妹公司，同屬大股東雷軍的小米又有新搞作。昨日公布會推出解像度同蘋果公司iPad的retina屏幕睇齊的平板電腦，以及49吋4K電視機。本來消息同金軟半點關係都冇，偏偏炒家長期一廂情願，認為雷軍會透過金軟蛇吞象，放小米入去借殼上市。

古勝冇點你2014/05/16

萬里長空

企業發債漸趨頻繁

在騰訊帶動下，恒指連升第六日，昨升148點收報22,730點，無騰訊的國企指數，跌20點收報9,971點。內地A股走勢極曳，滬綜指插22點，收報2,024點，連10日、20日及50日線都穿晒，睇落2,000點關口唔係好穩陣。

昨日古勝提過，人民幣匯價逆轉，發美元債博價息兼得的音樂椅遊戲似已告一段落，繼東方航空（00670）後，昨日內地第四大航空集團海南航空都話發點心債，導引息率大約6.5厘。另外，兗州煤業（01171）亦打債商主意，發7.5厘的永續債券（Perpetual Bond）。

人行撥亂反正，導致內地長期水緊，近日唔少內地企業都打永續債券主意，尤其係一些內房公司，貪還息唔使還本，實行有拖無欠。雖然話唔會因為發股票造成攤薄，但長期一樣係要畀息，煤炭行業有幾大鑊，貼市些少都一清二楚，上月底秦皇島動力煤價跌到每噸525元人仔，返到○八年水平，而兗煤近幾年債務情況亦都差強人意，總負債與股東資本比例由一一年的35%，一二年68%，去到舊年100%。

內地準買家心態變

假如樂觀到認為最壞時間過去，不如博隻正股。掉轉頭講，如果唔係個個諗住國企有阿爺撐腰的話，7.5厘確係風險同回報完全唔成正比。

本周初，一個由人行組成的銀行聯合會議上，人行要求內地銀行，確保住房消費貸款利率定價合理，加快貸款處理速度。市場解讀為中央見到近期內地樓市突然吹起淡風，連一線城市北京，五‧一假期銷情都按年大跌八成，所以希望透過出口術托一托市，向市場傳達銀行放鬆房貸相關貸款的訊號。

啱啱有朋友計劃喺四川置業，同在下呻話同當地銀行申請按揭，問過要畀到指標利率加2至3厘（即7至8厘）先借到錢，最後覺得唔划算而打退堂鼓。事件中，多少睇到內地銀行對審批按揭謹慎之極，準業主要取得借貸，要比想像中更難。

有券商指，過去十年內地樓價粗略計累積升1.6倍，現時家庭財政負擔比率跌至新低，愈來愈多內地市民心目中，自置物業並非「必需」，加上內地發展商近年勇於擴大借貸及投資規模，庫存積極情況開始浮面，準買家預期割價促銷會出現，等跌價先買心態一旦形成，需求將會萎縮。

利率市場化已展開

撇除銀行衡量房地產相關風險，唔願在按揭市場太過進取，古勝認為或多或少同馬雲有關。自阿里巴巴推出年化收益去到6至7厘的餘額寶，其吸金力強到暈，短短一年用戶突破八千萬之外，今年首季存入規模已經達5,400億元人仔，漸漸威脅到傳統銀行生意。

君可見近半年，內地銀行為阻礙存款外流，照辦煮碗推出類似貨幣基金產品迎戰，好似A股上市的興業銀行推出的「掌櫃錢包」，畀到5.5厘樓上的年化收益率，超越近月收益率跌回到5厘左右的餘額寶。

似乎利率市場化，已經間接由阿里巴巴開了第一槍，為免眼白白睇住存款付諸東流，銀行以相當於目前人民幣活期存款0.35厘的十多二十倍成本，要維持一定的放貸息差，銀行好自然在物業按揭，回報最低的生意上放軟手腳。

近期內房同內銀股走勢唔錯，在下相信會係估值跌至過分低殘的一次修正，基本因素其實並無大轉變。

古勝