絲絲講場：馮孝忠打乒乓練分析
乒乓球運動老少咸宜，恒生銀行（00011）一直支持香港乒乓總會推廣呢項運動嘅好處，恒生執行董事馮孝忠（Andrew）原來都打得吓，佢尋日露兩手，明顯有備而來。
Andrew話自己喺大學時代都有打乒乓球，除咗可以鍛煉身體，亦可以訓練分析能力同埋處事策略，例如估計對手將會點樣反擊等，所以無論係對人或者對事，對佢都好有幫助。唔怪得之佢睇中咗年僅九歲，舊年加入「恒生乒乓球學院」嘅學員范偉樂喇。
球員反應快啱做Trader
讀小學四年級嘅范同學志向遠大，目標係加入香港代表隊，退役後轉職做教練，佢家住長洲，放學後到元朗訓練乒乓球，每次來回就要用四個鐘；一星期練五日，每次打兩個鐘，返到屋企已經係夜晚八、九點，但係無損佢對乒乓球嘅熱誠，原因好簡單：「好玩。」
Andrew話如果范偉樂日後退役唔做教練，可以考慮加入恒生做金融市場交易員，因為同打乒乓球一樣，兩者都好講求即時反應。
余絲韻