絲絲講場：和黃陸法蘭 識得廣東話
和電香港（00215）尋日召開股東會，主席霍建寧心情似乎唔錯，雖然佢同管理層都冇見傳媒，但有小股東就同絲絲全程現場「報道」，都幾搞笑o架。話說霍大班一坐落嚟，就向全場小股東講：「今日全部係香港人，可以開翡翠台，唔使講英文。」吓，明明陸法蘭（Frank Sixt）坐喺台上，淨係講廣東話，唔通當佢冇到？
居港廿多年 半個地膽
Frank係和電香港非執董，亦係和黃（00013）嘅大掌櫃，小股東以為霍大班口快快講錯，應該會轉番麗音廣播，點知霍大班語出驚人，話Frank識廣東話，隨後霍大班真係喺股東會全程用咗廣東話嚟進行，Frank亦冇表現得不自在。
絲絲問咗多位Frank喺和黃嘅同事，大家都話佢喺香港住咗二十多年，已經係半個香江地膽，斷估都應該識聽一些生活上嘅廣東話用語，但好少聽到Frank喺公司講廣東話喎。
曾夾Band做過唱作人
Frank果然係真人不露相，據絲絲所聞，Frank仲係音樂狂熱分子，聽講佢以前喺楓葉國曾組隊夾Band，係樂隊嘅靈魂人物，皆因佢有作曲天分，仲曾經幫某部電影作過曲添。
余絲韻