Market Insight：內房估值 仍未見底

投行的資金流報告顯示，更多投資者將資金由股市撤出，回到相對防守性的資產，主要是債券身上。環球股票基金錄得93億美元淨流出，是二月至今最大單周紀錄，反之，債券基金有90億美元淨流入，是十三個星期以來最多。美國就業數據再強勁，似乎都無法教一心要「sell in May」的基金經理回心轉意。

今年在環球股市中屬包尾大幡的中港市場，芬佬risk off手影亦都十分着迹，兩個月以來，網絡股、醫藥股、IT設備股、燃氣股，到上星期濠賭股都出事，在過去年多時間幫對沖基金賺到盤滿砵滿的板塊，一個接一個咁被清倉套現，近期電訊及內銀股突然醒神，在下深信同基本因素改善無關係，純粹是基金經理買無可買，暫時作為資金停泊之用。

古勝冇點你2014/05/12

萬里長空

騰訊拆細討好散戶

今個星期新經濟股領袖騰訊（00700）公布季績，並且進行一拆五。拆細股份實際對一間公司投資價值無真正的幫助，純粹是降低入場費討好散戶，可唔可以令調整趨勢暫時逆轉，不妨又睇吓散戶最終幫到幾多。

講開網股，騰訊持股的內地購物網站京東商城，搶在阿里巴巴前面，周末公布到納斯達克市場上市，招股指引每股美國存託股份（ADS）介乎16至18美元，預計最高集資額為19.39億美元資金，今日開始正式上市前推介活動，本月二十一日定價。

中國網絡股赴美熱潮是否由熱轉冷，京東可以話係試金石，尤其賓架界一向視佢為中國亞馬遜，或者阿里巴巴二號，今次美國投資者受唔受落，對嚟緊阿里巴巴搶唔搶到天價估值招股，影響唔細。

內房股四月合約銷售陸續公布，表現參差，龍頭股中國海外（00688）意外地按年及按月都錄得跌幅，華潤置地（01109）按月僅升6%，較理想的包括雅居樂（03383）、世房（00813）、合景泰富（01813）、龍湖（00960）同恒大（03333）。

姑勿論四月得定唔得，一眾內房股都跌得七個一皮，一來近期新聞大肆報道，內地「五一」假期，一線城市新盤銷售淡過水，北京一手成交按年跌八成，而房地產融資甚至按揭又傳水緊，在發展商開始加大二三線城市的降價促銷力度底下，客觀睇內房已經抵買，只怕係五折的估值，短期仲有可能會去到四折甚至三折。

輝山拍外資有運行

近期有份被洗的乳業股，上周見到部分率先搵到支持，一來內地開始為進口嬰兒奶粉實施註冊制度，趕走三、四百種貼牌假洋貨，挽回消費者信心，但較令人感意外的，是乳業股未算統統受惠於這個消息，好似合生元（01112）上周五就隊到落低位46元，重返舊年九月水平。

早輪被基礎股東減持的輝山乳業（06863），終於搵到個大碼頭，宣布同荷蘭皇家菲士蘭成立合營企業，在中國生產及銷售嬰幼兒配方奶粉（IMF）產品，內地嬰兒奶粉市場幾乎係外資天下，五大外國品牌佔去六成市場，部分一線城市，國產貨更只有1至2%市場份額，配方奶粉初哥輝山要打入市場，除咗搵外資拍檔外，其實冇第二條路好走。

瑞銀估計今次輝山同菲士蘭合作可以令其設備使用率改善，虧損減少，目標價睇3.2元，會唔會過分樂觀？無論如何，至少都要過咗近期股東大手減持的2至2.2元關口，消化咗批蟹貨至有運行。

長城汽車暫宜觀望

上周五，長城汽車（02333）復牌，並宣布延遲交付哈弗H8後，股價大瀉16%，收報27.25元。長汽股價自去年十月高位51.9元後見頂回落，今年首季在31元水平做出雙底，就係靠四月份車展時市場對哈弗H8的期待而展開反攻，但如今竟要延遲交付，難怪芬佬不留情沽之哉。

呢次再傷股民心，加上唔知產品整改要幾耐，顯然「長城飛車」之喻已成過去式，即使股價回穩，亦要一段時間休養生息，暫宜觀望。

古勝