太陽國際資源（08029）業務不嬲出名多元化，唔止搞網上遊戲、天然資源開發，仲有管理高級休閒度假酒店等等。之不過，原來公司仲有一樣業務近年更加搞得有聲有色，絲絲講緊嘅唔係賽馬或者賭馬，而係純種馬匹買賣，由馬匹配種、飼養到訓練馬匹場地一條龍業務，直頭係好專業嗰隻。
好似啱啱係日前，公司就出通告披露用咗450萬澳元（約3,267萬港元），買咗一隻今年贏過聖佐治盃同埋澳大利亞盃賽事嘅雄性靚馬，諗住作為種馬配種，相信可為公司股東帶來更多收益。通告仲話，呢匹種馬○八年喺愛爾蘭出生，系出名門。
其實，太陽國際資源去年開始投入育馬事業，先後喺去年同埋今年多次買入多匹靚馬以及育馬場地，用嚟做純種馬配種、飼養及訓練等等，睇嚟公司主席鄭丁港對馬匹都頗有研究。
絲絲印象中，香港上市公司裏頭愛馬人士大有人在，好似升岡國際（00485）主席劉錫康同埋中信泰富（00267）前主席嘅榮智健，但都限於個人興趣，好似鄭丁港咁樣，發展成上市公司嘅業務暫時無出其右，睇嚟發展落去，太陽國際資源好大機會成為香港第一隻「育馬股」添。
余絲韻