美國前財長蓋特納辭官後幾乎銷聲匿迹，但《紐約時報雜誌》報道，佢將會喺下星期出版嘅新書《Stress Test︰Reflections on Financial Crisis》揭露救市內幕，大爆奧巴馬政府曾公開討論將花旗、美銀等大行國有化，獻計者居然係被視為親華爾街嘅時任白宮首席經濟顧問薩默斯。
蓋特納話，薩默斯唔單止建議總統奧巴馬國有化銀行，仲提出改變大行嘅薪酬結構，等班銀行家學識寫個「醜」字。
佢本人唔同意咁激進嘅做法，仲話坐喺奧巴馬側邊聽住佢鬧銀行薪酬嗰陣覺得唔舒服。
同樣估唔到嘅係，一直着手終結「大到不能倒」嘅蓋特納批評，為咗納稅人將來唔使出資打救銀行，就去根治「大到不能倒」嘅做法不切實際。蓋特納仲同記者講，自己早就想「劈炮」唔做財長，奈何奧巴馬係都唔放人。
不過，人稱「救市三劍俠」之一嘅佢坦言工作留低好多遺憾，因當年救市明顯唔夠盡力，例如金融海嘯侵襲之前，冇叫聯儲局加強對銀行嘅防護措施，亦冇促請國會立法保護非銀行金融機構，令市場恐慌情緒無法紓緩。
余絲韻