呢排科網股跌到四腳朝天，一眾所謂專業投資者嘅對沖基金照樣損手，HFR數據顯示，整體對沖基金繼前月蝕0.33%後，上月再虧損0.17%，連續兩個月「見紅」，為近兩年首見，表現仲跑輸標指期內0.74%回報，當中押注科技同醫療護理嘅對沖基金蝕3.7%，係○八年以嚟最傷。
近排行衰運嘅對沖基金不乏名牌出身，其中由Philippe Laffont領軍、規模達90億美元嘅老虎仔基金Coatue Management就連續兩個月蝕4%，累到今年以來輸咗成11%，差不多將上年所賺一半嘔番晒出嚟，都咪話唔陰公。
對於被收取高昂管理費同表現費嘅投資者嚟講，對沖基金依家咁嘅表現，相信佢哋都唔忍得好耐，因為近年對沖基金嘅表現一直可以用「平庸」嚟形容，值唔值得繼續投放咁多資金落去，真係好成疑問！
不過凡事都有例外，維權基金阿克曼最近就大發神威，皆因佢揸重貨嘅藥廠Allergan獲加拿大同業Valeant睇中，仲聯手提出收購，帶挈佢隻基金Pershing Square上月回報大升7.3%，淨係頭四個月回報就進帳咗18.7%，投資者應該飲得杯落。
余絲韻