Market Insight：游資充裕唔使恐慌

曾經被視為中國經濟希望的騰訊（00700）、燃氣股同手機設備股，近排陸續被人隊到反白眼，昨日對沖基金搵大錢的濠賭股出事，銀娛（00027）及金沙（01928）雙雙急跌。話就話，因有傳澳門計劃七月修改內地客過境逗留的期限，以及銀聯推措施打擊在賭場碌卡，阻截資金外逃，兩單消息雙管齊下至出事。

但講到尾，濠賭股由○九年後海嘯至今，升足五年，近期有迹象顯示，內地訪港澳的個人遊人數同消費力都有見頂趨勢，大孖沙搵藉口清空倉底，其實一啲都唔出奇。

古勝冇點你2014/05/09

萬里長空

傳統基金焗住入市

傳統基金同散戶最大分別，是基金經理每年收基金託管人的巨額管理費用，無可能將倉底變晒現金等運到。近期見有大行統計，本地基金的現金水平處於相對高位，出清過去兩年大幅跑贏大市的增長股之後，點都要搵地方停泊，惟有先搵住一些穩陣，估值低殘的股份擺住先。

昨日八百幾隻股票向下，唔少基金股猶如遇到股災一樣，恒指仲有90點進帳收報21,837點，要多得兩隻石油股同內銀撐住，兩隻賭股交投激增，金沙成交股數創二十三個月新高，估吓基金買乜？

兩油及內銀價硬但未見成交異動，反而半死唔生的中移（00941），股價升3.3%，成交股數比前日多七成八，有黃袍加身味道。中移75元樓上追唔追，見仁見智，基本因素是今的「營改增」新稅務規定，同埋統一發展基站消息，對一哥中移都唔係太有利。

更重要，基金買貨同散戶唔同，尤其一些以指數做表現基準（benchmark）的互惠基金，唔一定要押重注股份做好，如果佢哋認為後市唔掂的話，佢落注中移度，只要其他股份同埋基準指數（例如恒指或MSCI HK）跌得比中移多，年結時已經有晒交代。

貼近兩萬一諗買乜

但話說回頭，滬港通之後港股弱到咁，的確出乎意料。隔晚聯儲局主席耶倫又再派定心丸，話美國經濟仲係需要較寬鬆貨幣政策，照計新興市場撤資的風險已經大減，十年期美債孳息在2.6厘水平，顯示長期息率有穩定下來的迹象。港元兌美元更係持續企住今年高位，與強方兌換保證只差十幾二十點子，並不見股市轉弱資金流出的情況。

結合古勝同基金朋友的非正式統計，都顯示街外游資其實好充裕，大家只係缺乏一個令市場對股市及中國經濟睇法轉向的理據，21,000至23,000點的回力球可能仲要玩多陣，但當貼近上落區下限，似乎股民應該諗諗有乜好買，唔係加入恐慌拋售行列。

滙控息率仍算吸引

唔少散戶有興趣的滙控（00005），季績曝光後，在倫敦及美國預託證券都跌得比較多，反而昨日香港市僅跌0.19%收報78.25元。首季稅前盈利67.85億美元，跌20%，歸納今次季績，環球經濟仲係相對疲弱外，最主要是投資減值的一次過變動影響。目前綜合大行預測，滙控今年全年盈利有179.6億美元。

大部分大行預計，未來兩三年這跨國巨無霸收入與純利，只會有單位數增長，一四年10.7倍PE，1倍PB，抵唔抵？觀點與角度問題。在下以股息行先，近期見股市無嘢好炒，睇見渣打集團（02888）同香港滙豐的永續債券，原來統統唔夠5厘，得4.8至4.95厘。滙控首季一級資本比例平穩，只係輕微從10.9%收窄到10.8%，如果環球經濟展望風平浪靜，滙控應該無危險，亦毋須減派息。

滙控一四年股息估計有5.22厘，高過十年美債2.6厘成倍。除非聯儲局出年突然轉軚，甚至大幅加息，否則80元樓下的滙控，應該可跌空間好有限。最大風險係怕當股市氣氛逆轉，揸滙控會輸蝕畀其他有增長古仔支持的股票。

古勝