孖妹S檔案：來自魚缸的Oppa講港股

金：韓國散戶 金尚鉉

崔：韓國散戶 崔津榮

彩兒：Kitty，我上周落行時發現兩位來自韓國的Oppa呀！但我好怕醜，你拿拿臨陪我走一趟魚缸，再介紹畀你識啦！

Kitty：你已有白馬王子，日日sweet到漏，仲要搵韓國Oppa？

彩兒：哈哈，講呢啲！據聞韓國散戶投資有道，趁住呢期泡菜文化咁hit，我哋當然要秉承孖妹八卦到盡的精神，了解其投資風格及取態，起碼對一班好姊妹有所交代嘛！查實你哋廣東話講得咁好，是否嚟咗好耐？

買實力股有信心捱價

金：我細細個跟父母過來，已住咗三十年，對香港的環境、文化、制度，分分鐘仲熟過韓國，所以十幾年前有閒錢時，選擇了投資港股，後來建立了投資信心才涉獵韓股。猶記得○一年首次買股時膽粗粗拎咗十幾萬出來，結果在一年內賺咗30%。

崔：我哋自小移民過來，可謂半個香港人。不過，我在港股暫時是「初哥」，正在摸索階段，尤其近期港股波動，令成績表現麻麻，但我深信未來有升值空間，唔怕等！

Kitty：依家港股愈來愈難玩，年內跌4.49%，小股民搵食並不容易，當中有何竅門呀？不如過兩招畀大家！

金：買股票不能瞓身，最好有閒錢才去投資。港股有升有跌，好難捕捉最低位，難免出現捱價的局面，但只要公司有實力，股價總有回升的機會，故長線計，贏的機會始終較多，至緊要肯等，例如中移（00941）的估值偏平，應可重回80元水平。不過，股票好難賺到盡，需同時會把止賺位定於30%，較為穩陣。目前我主力持有滙控（00005）、中移、思捷（00330）、港交所（00388）等股份，每年約有15至20%回報。

不過，齋買港股太集中，為分散風險，我在○五年開始投資韓股。講真，韓股市場不如港股般成熟及開放，上落波幅較大，甚考揀股眼光，如去年SK Telecom（韓股：017670）飆升了50.82%，現時較看好生物科技的前景，正留意相關股份。至於三星電子（韓股：005930）的走勢雖有回落迹象，但其環球市場佔有率仍有提升空間，料可有利股價上升至200萬韓圜呀。

彩兒：韓股似乎過了高增長時期，近年有回吐迹象，今年表現麻麻喎！不過，近日韓星人氣高企，早前金秀賢來港掀起小旋風，仲有全智賢、少女時代等等，令到當地娛樂股大受追捧，似乎可看高一線！

韓股波動大 要識止蝕

金：今年韓股下跌2.58%。識買韓股的一定要定止蝕價，由於韓股規模較細，大戶容易舞高弄低，一旦下挫或會跌得又深又狠，加上漲跌停板機制，股民隨時走唔切。另韓股的政治因素較大，韓國將在六月有地方選舉，料會增加韓股的波動性，但年底前有機會轉好。

崔：韓國有三大娛樂經理人公司，包括YG（韓股：122870）、SM（韓股：041510）及JYP（韓股：035900），當中以YG的股價表現領先，年內升3.71%。目前看，韓流尚可持續，我對當地娛樂股的盈利潛力仍感樂觀呀。

拒短炒 傾向月供基金

Kitty：不過港人買賣韓股有難度，兼且交易費用較貴，其中輝立証券的佣金收費為成交額的0.35%（最低收費為20,000韓圜），另在沽貨時有0.3%銷售稅，似乎投資基金較為划算喎。據晨星（香港）網站，韓股基金組別的一年回報達9.66%！那麼韓國人的投資習慣是甚麼？與香港人相似嗎？

崔：香港人多會一窩蜂投資同一隻股份，羊群心理較明顯，另會即日買賣，炒風較強。而韓國人則會深思熟慮，多做長線投資，傾向月供基金，尤其重視穩健增長，普遍而言，投資風氣不及香港盛行。不過，除炒股外，我偏愛投資磚頭，即使貶值亦有瓦遮頭、有個保障嘛。猶記得我在○三年買入一個貝沙灣單位，當時的買入呎價為4,600元，結果短期內飆升至7,000元/呎，最後獲利高達一倍並轉手買入該屋苑更大單位。另我亦有投資韓國樓市，因諗住退休後有個安樂蝸！

彩兒：咁韓國女仔呢？佢哋投資叻唔叻？

金：大部分韓國女生會注重儀容，由於她們較為保守，多以家庭為中心，對投資興趣不大；但香港女生則較為獨立，較為重視理財、投資，例如朋友間談到3888（金山軟件）時，她們有機會可搭上兩嘴，但韓國女生或會以為唇膏色號，哈哈！

彩兒 Kitty

若有料報畀彩兒同Kitty或有嘢問，可電郵money.biz@on.cc