巴郡呢個禮拜六開股東大會，絲絲希望股神巴菲特到時透露多啲接班進度！未到股東會，巴菲特已經忍唔住講吓交接安排，一向唔贊成認股權支薪嘅股神，日前接受《財富》雜誌訪問話，第日交棒後巴郡只有CEO至可以認股權作為薪酬，因為日後只有CEO係為公司所有成就負責嘅人，嚟緊會就呢個安排出一份備忘，刊於下年出爐嘅年報上。
早喺九五年，巴菲特已炮轟認股權花紅問題，當時佢話：「有邊個抗拒到呢種免費彩票？但呢種支薪安排對公司嚟講根本係浪費！」
兩年後，佢喺「致股東的信」入面再講起呢個問題，話認股權最終價值可以由零至無限大，令受惠員工不得不以阿Q精神看待，失去咗公司激勵同獎賞員工嘅意義之餘，亦削薄股東嘅權益。
股神早排話天然氣價格係咁跌，預咗投資喺前身為TXU嘅能源公司Energy Future筆錢凍過水，間公司隨時破產，果然開口中，呢間公司尋日正式申請破產。
余絲韻