金融海嘯之後，個個（目及）實啲Banker人工，稍為高啲就喊打喊殺。財經網CNBC委託咗Equilar做咗一個歐洲大行總裁薪酬調查，結果發現歐洲Banker個個人工都有得加，平均加幅超過一成。雖然滙控（00005）CEO歐智華總薪酬跑贏晒佢啲行家，但講到增幅，就輸比法農及瑞信嘅行政總裁。
「贏到開巷」嘅歐智華去年全年人工加花紅高達1,270萬美元（約9,906萬港元），係歐洲各大銀行CEO之冠。不過睇番佢舊年成績表，增幅其實只有5%，跑輸其他CEO成條街。
根據個調查，今年歐洲各大銀行總裁嘅薪酬都有加幅，好多位升幅甚至有10%以上添。
升幅最多嘅係法國農業信貸銀行CEO，佢全年實收近三百萬美元，雖然同歐智華比依然差一大截，喺個榜入面只係排第十二，但同佢上年人工比就有43%升幅。
排第二嘅係瑞信CEO，全年人工加花紅超過一千萬美元，升幅達28%，真係令唔少打工仔眼紅。
不過，歐盟由今年開始將會同歐洲銀行大班嘅花紅設上限，高層最多只可以獲取相當於一年嘅人工，所以都係風光埋最後今年，銀行真係要諗下其他辦法挽留班銀行大班啊！
余絲韻