Market Insight：蒙牛乳業正路之選

未來兩日市場焦點係一連兩日聯儲局議息會議，九成九的大行預料主席耶倫會繼續縮減每月買債規模，下月會再縮100億去到450億美元，值得一提新浪分拆出來的微博（代號WB），掛牌後見過24.24美元，做完短暫的英雄後，股價已輾轉回落，隔晚隊8.8%收報17.51美元，同17美元的發行價已一步之遙，睇怕最唔想見佢破發的，是招股已經轉正入大直路的阿里巴巴首領馬雲。

基金換貨手影明顯

昨日期指結算日，港股臨收市前一個鐘先嚟挾上，恒指由最多跌過33點，到收市倒升321點收報22,453點，夠晒反高潮。主板成交611億元配唔配合升市見仁見智，惟基金換貨手影十分明顯，銀娛（00027）及金沙（01928）兩隻新經濟股插4.5%及2.6%，反而幾隻舊經濟股撐起個市，淨現金兼高派息的中移（00941）升4.5%，連同友邦（01299）、滙控（00005）、中海油（00883）及三隻藍籌內銀，七隻股票已經貢獻恒指210點。

古勝冇點你2014/04/30

萬里長空

以半杯水理論，資金由新經濟換入估值低增長潛力較低的舊經濟股，悲觀睇可以話基金經理都趁Sell in May前risk off，非好兆頭；阿Q啲睇，至少熱錢依然眷戀港股，未走得晒。去年先第一次涉足國際債券市場的中國國家電網，早兩日發美元債，30年期指標息率不過較美國國庫券加155點子，約5厘。

即使魚缸話中國經濟放緩，一陣又話六月會係地方債踏入爆煲高峰期，見微知著，阿爺電網可以輕易借平錢，可見市場資金不缺，內地經濟不利消息，未動搖祖國項目信貸評級（國電網穆迪評為Aa3）在國際市場上繼續改善的大趨勢。

廣汽集團（02238）首季盈利升77.6%至8.49億元人仔，主要係合同銷售有兩成增長同時，銷售、廣告及行政開支升幅相對低，以及去年首季比較基數低所致，股價抽升6.9%後，一四年市盈率10倍屬合理。

撈達芙妮再等陣先

另外，早兩日講過達芙妮（00210）隻可換股債券六月中到期，可以諗諗佢，估唔到轉過頭揸住隻CB的私募基金TPG，同達芙妮管理層傾掂數，同意延長CB期限至明年四月，同時豁免達芙妮利息及顧問費，變相免息借多一年錢畀達芙妮。

好的一面睇，達芙妮短期唔使趕住班水贖番批CB，有更多彈藥食住「星星」條水，谷新簽代言人全智賢的廣告；不過，壞影響係批CB行使可能性猶在，相當於11%攤薄，似乎暫時可以睇定啲先。

昨日兩隻乳業股隊到開巷，現代牧業（01117）非全資附屬公司現代牧業集團，首季盈利2.24億元人仔，勁升1.77倍，收入升85.7%至12.39億元人仔。瑞信報告亦唱好，認為現牧今年主打加強成本控制，產品售價及產量理想升增長下，睇4.5元，但股價昨日仲要無端端隊低7.4%收市，兩日加埋跌13.6%。

乳業股被洗，一來新西蘭原乳今年跌緊價，多少對內地上游乳業股有心理影響，更重要係輝山乳業（06863）冧檔的骨牌效應，禁售期一過，輝山兩個基礎投資股東急不及待出貨，消息困擾，輝山昨最多隊低18%，收市仍跌9.8%收報1.65元，同舊年九月招股價2.67元相比，認咗無走過，帳面上經已輸緊成蚊。

輝山博反彈風險高

一一年輝山上市前可換股票據引入的基礎股東，上市前票據換成股份，計落每股成本只係約0.73元，兩蚊邊掟仲係獲利甚豐。一句到尾，禁售期一到舊股東狂質，姑勿論影唔影響營運（始終彤叔未出過貨），不知就裏的投資者，引發恐慌是在所難免，一四年市盈率14.1倍，同現牧14.9倍唔差幾遠，昨見1.6元附近營造成交密集區，古勝唔反對大家知道高風險下，博吓即市反彈，惟穩陣計，似乎現牧甚至控股股東蒙牛（02319）會係比較正路選擇。

近日股仔急瀉，隨時有技術反彈。彩票股華彩（01371）昨日低位顯著回升，原來有護盤行動，回購4,550萬股，作價介乎0.52至0.58元，涉資2,500萬元，估計行動尚未完結，加上世界盃快開鑼，宜望多兩眼。

古勝