絲絲講場：渣打一半高層登上旗艦
中環交易廣場尋日一早，鑼鼓喧天，原來係渣打香港喺中環富臨閣（The Forum）嘅私人及個人銀行旗艦店完工，可以開張營業，呢個耗資10億元嘅新旗艦，喺交易廣場嘅建築物嚟講，外形都好獨特下。呢個大project完工，難怪「一打」渣打高層齊齊現身，有一半都係專登坐飛機返嚟香港呢。
啟業儀式場面熱鬧
絲絲見到嘅高層，包括亞洲區行政總裁白承睿、大中華地區及香港行政總裁洪丕正，仲有首次現身嘅渣打私人銀行客戶環球總監潘文浩，佢同廖淥波、馬敬明都會駐守香港，睇實私人銀行業務。
由富臨閣重建而成
啟業儀式揀喺朝早八點四十五分舉行，之後仲有一班渣打員工喺中心前面跳舞助興，搭正九點就開門做生意。絲絲聽聞，遲啲仲會有一個正式嘅開幕典禮添。
交易廣場業主置地喺二○一一年底開始重建富臨閣，由5層增建為7層，渣打銀行前年好快手咁落實租用全幢大廈，但就唔肯講租約究竟有幾長。
經過重建之後嘅富臨閣，已經變身為渣打財富管理中心，設有私人銀行、優先理財中心，以及交易廣場分行，尋日有三百四十名員工進駐，大部分係私人銀行部門員工。
余絲韻