絲絲講場:花旗學生最Like張敏華

花旗銀行學堂圓滿結束。呢個結合銀行實務、由花旗香港派多位資深銀行家教書嘅香港大學課程,已經舉辦到第十屆,絲絲趁機捉住三個學生,搞咗個我「最喜愛老師」選舉,冠軍係「新聞之花」轉為「銀行之花」嘅張敏華(Catherine)!

林鈺華講二百年歷史

喺外國浸過鹹水嘅袁同學話,Catherine講嘢好有啟發性,第時想入去花旗做財富管理部門,幫客人度身訂造財務計劃——講咁多即係想跟Catherine搵食啦。嬌滴滴嘅Jennifer同學,都係最鍾意Catherine,但個人喜好係法規部門,因為鍾意查吓啲異常交易喎。姚同學就Like爆零售銀行業務主管林鈺華,覺得佢好有個人魅力,由二百年前嘅花旗集團講到今日嘅金融體系,打通學生嘅任督二脈。

Catherine知道自己咁受歡迎之後,同絲絲講話好感動,覺得學生都好積極,二年級已經發光發亮。花旗香港區行長盧韋柏就鼓勵學生好好把握眼前機會,機會就會向你拍門,結果絲絲問學生仲有咩想講時,一個話:「多謝花旗。」另一個話:「花旗燃亮下一代。」真係好識把握機會喎。

余絲韻