絲絲講場：馬斯克：都敏俊係乜水?
「星星」都敏俊教授，係絲絲近期最愛，就算冇追套劇嘅，點都聽過，不過汽車界紅人特斯拉CEO馬斯克（Elon Musk）就公開話唔識得邊個係都教授，唔緊要，都教授嘅粉絲，好似天上嘅星星咁多呢！
央視主持被轟唔專業
人稱「鋼鐵俠」嘅馬斯克依家去咗內地，早前佢接受央視訪問，節目主持人讚佢係喬布斯、鋼鐵奇俠同都敏俊嘅結合體，仲問佢覺得自己似邊個多啲，點知馬斯克話自己唔識都敏俊喎！馬斯克呢個答法，明顯係對主持人嘅爛Gag唔多受落。
唔單只馬斯克唔多Like主持人，網民都彈主持人問得無水準！睇到絲絲都笑唔停口！有博客撰文批評央視主持人嘅問題太過業餘，唔使問都估到對方會講乜，同埋就算上百度都搵到答案！
特斯拉推平民價新車
就好似「你為甚麼這麼願意在一個細節上打造這麼極致？」「你是否看好自己做的行業？」，博客就嘲諷話佢問得真係「好」，就好似問一個女仔點解將自己打扮得咁靚一樣咁有深度同有內涵！
馬斯克今次去內地，係為咗推廣佢哋嘅車，佢話特斯拉未來會愈嚟愈便宜，等平民都上到車。特斯拉嘅第一架車係跑車，第二架係Model S，而第三架會更平，應該係平民可以接受嘅價格。
佢認為應該先由最高級嘅車型做起，為特斯拉生產平民價格車型提供基礎，而呢個過程係必要嘅。
余絲韻